أنا هو الطريق والحق والحياة - تأمل روحي

أنا هو الطريق والحق والحياة زي ما كلنا عارفين دي جت في يوحنا 14: 6. هي الحقيقة ما ينفعش موضوع لأن كل جملة عقيدة لوحدها مش موضوع. السيد المسيح هو الطريق، السيد المسيح هو الحق، السيد المسيح هو الحياة. لكن هم زنقوني فيها إنها كلها موضوع، فإحنا هناخد كده خمس دقايق في كل موضوع أو عشرة، لكن هم بيتكلموا عن صفات مهمة جداً في حياة السيد المسيح. صفة الطريق والحق والحياة. باختصار شديد قوي، الطريق كلمة عبر بها الكتاب المقدس عن كيفية الوصول إلى الله. كيف يصل الإنسان وإيه الطريق اللي يوصله لله؟ فده كان الكتاب المقدس في العهد القديم بيتكلم بهذه الجملة، الطريق عبارة عن كيف يصل الإنسان. إيه هو الطريق في العهد القديم؟ كان متحدد في الناموس. الناموس وصايا العهد القديم، حفظها هو اللي يوصل إلى الله. إذاً الطريق في العهد القديم هو الناموس ومعناها بحفظ الناموس تستطيع أن تصل إلى علاقة قوية مع الله. في العهد الجديد لأن السيد المسيح هو الابن الوحيد اللي بذل ذاته عن حياة العالم وهو اللي أعطى حياة للإنسان، بهذه الحياة يستطيع أن يصل إلى عمق العشرة القوية والاتصال الكامل بالله. ليه؟ لأنه هو والآب واحد. من رآني فقد رأى الآب. عشان كده توما كان مستغرب، السيد المسيح بيقولهم أنا ماضي لأعد لكم مكاناً، ومتى أعددت لكم مكاناً سآتي وآخذكم معي. توما طبعاً قال كلام يعني ممكن السيد المسيح يزعل منه لو أي حد يزعل منه، قالوا نيجي معاك إزاي؟ وهو قالهم وأنتم تعلمون الطريق، قالوا نيجي معاك إزاي وإحنا مش عارفين إنت رايح فين؟ رد كده بعمق، المسيح بيقولهم إنتوا عارفين الطريق لأن الطريق هو المسيح وهو اللي بيكلمهم، فمش معقول هو بيكلمهم وهم مش عارفينه. لكن لهذا الوقت ما كانوش فهموا إن الطريق هو المسيح. بيقولهم إنتوا هتوصلوا للحياة الأبدية المعدة لكم عن طريقي أنا اللي بكلمكم وإنتوا عارفين الطريق، فإحنا مش عارفين الطريق وإحنا مش عارفين إنت رايح فين لما هنعرف الطريق. لكن السيد المسيح كما عودنا إنه يستحمل سواء عنف الأسئلة اللي وجهت ليه أو عنف الإجابة، بكل هدوء قاله أنا هو الطريق. وده يورينا برضه طريقة ربنا معانا إنه أحياناً يتعامل معانا كده وعاوزين إحنا نكتشف الحاجة بنفسنا، مش لازم يتكلم عن ذاته كتير. وهويته ما كشفهاش بسهولة لكل تلاميذه إلا لما كان يضطر موقف إنه يشدد ويقول. لكن كان يحب إنه كل تلاميذه يفهموا منه كده، زي المدرس الناصح يعني مش لازم وهو بيشرح تيجي حاجة صغيرة كده دي إيه يا أستاذ؟ ما دي إنت تكون عارفها من قبل ما أنا أقولهالك. فبيتضايق لما أو بيزعل لما وهو بيشرح في حاجات حد يسأله في حاجة صغيرة كده طب دي إحنا مش عارفينها، ما إنت لازم تكون عارف دي. ومع هذا وضح لهم أنا هو الطريق والحق والحياة. عشان كده يوحنا المعمدان لما نادى على طول بالاستعداد لقبول المخلص قال أعدوا طريق الرب، استعدوا للطريق الحقيقي اللي يوصلكم لله. في أدلة كتير في العهد الجديد بتؤكد وطبعاً دي صفة إلهية بتؤكد ألوهيته إنه هو الطريق هو الموصل إلى العلاقة القوية لله. بالإضافة لكده في نبوات وحاجات إشارة بسيطة في مفهومها كده وفي ظاهرها لكن قوية في مفهومها إنها توضح إن السيد المسيح هو الطريق. بيقولنا كده في إشعياء 35: 8 تكون هناك سكة وطريق يقال لها الطريق المقدسة، لا يعبر فيها نجس بل هي لهم، من سلك في الطريق حتى الجهال لا يضلون. وفي عبرانيين بنفس المعنى 10: 19 لنا أيها الإخوة ثقة بالدخول إلى الأقداس بدم يسوع المسيح طريقاً كرسه لنا حديثاً حياً بالحجاب أي بجسده. إذاً في إشارة في العهد القديم بتؤكد إن السيد المسيح هو الطريق اللي يوصلك إلى العلاقة القوية بالله، أي حاجة تاني ممكن تتوه. وهو ليه الطريق؟ لأنه هو والآب واحد، هو الابن الوحيد اللي بذل ذاته عن حياة العالم، هو اللي كرس ذاته من أجلنا، كرس ذاته ووهب لنا ذاته بمعنى إنه نقدر زي ما بيقول أي بجسده نقدر ناخد جسده ودمه وبجسده وبدمه نتصل به يبقى لينا عشرة قوية معه وبهذا نكون وصلنا إلى الحياة الأبدية مع الله. طريقاً حديثاً ليس كالأنبياء في العهد القديم لأن في أنبياء كتير في العهد القديم كانوا بيشرحوا وبيوضحوا الطريق لكن السيد المسيح رسالته تختلف. المسيحيين أطلق عليهم إنهم أهل الطريق أو أهل المسيح، في أعمال 9: 2 بيقول كده عن القديس بولس قبل ما يؤمن بالمسيح ذهب إلى سوريا يقول كده حتى إذا وجد أناساً من الطريق رجالاً أم نساء يسوقهم إلى أورشليم. في أعمال 19: 9 ولما كان قوم يتقسون ولا يقنعون شاتمين الطريق. إذاً الطريق هو الوصول إلى الله ومش ممكن إنسان يصل إلى العشرة القوية لله إلا بالسيد المسيح أي بجسده ودمه ولو إحنا سلكنا فيه يبقى إحنا والمسيح واحد لدرجة إنه يطلق علينا إن إحنا أهل الطريق. أنا بقول باختصار قوي عشان أدي فرصة لسيدنا، بالإضافة إن الموضوع موضوع لاهوتي أقوى من إنه يتقال في عشر دقايق لأنه صفة من صفات السيد المسيح اللي بتثبت ألوهيته. أنا هو الحق. الحق معناها الغير مخفي، حاجة ظاهرة. ليس مجرد كلام ظاهر بل هو حياة ظاهرة لا يستطيع أحد أن يخفي الحقيقة. الحق هو أيضاً المعرفة الكاملة غير الناقصة. الحق أيضاً هو الطبيعة الإلهية، دي كلها معاني كلمة الحق في الكلمات اليونانية. إذاً الحق في المعنى الحقيقي هو غير المخفي، الشيء الواضح للكل زي الشمس كده خلاص تبصلها ما تقدرش تقول أي حاجة دي حقيقة، ما تقدرش تخفيها ظاهرة ما تقدرش تخبيها. والمعرفة، المعرفة الحقيقية الإنسان اللي يعرف المعرفة الحقيقية هي ده الحق. أيضاً الطبيعة الإلهية أي بمعنى الحق. عشان كده في قانون الإيمان آباؤنا بيقولولنا عن الله إله حق من إله حق. لما بنتكلم عن صفات السيد المسيح بنقول كده النور الحقيقي، الكرمة الحقيقية، الخبز الحقيقي، الله الحقيقي، بالحقيقة قام، فكأنه الخبز الإلهي، الكرمة الإلهية، قام قيامة إلهية، فإذاً الحقيقة هي صفة من صفات الله أو تظهر طبيعة الله. الحق هو الأصل الصادق، ده الحق ده الشبيه. فإذاً السيد المسيح لما يقول أنا هو الحق يبقى هو الغير مخفي ما حدش يقدر يخفيه، هو المعرفة الكاملة، هو الطبيعة الإلهية، هو فيه كل الصفات الإلهية، هو الأصل الصادق لله عشان كده بيقولنا المسيح بهاء مجد الآب ورسم جوهره. قديماً الله قال على الإنسان نخلق الإنسان على صورتنا، حاجة شبه، لكن بالنسبة للسيد المسيح هو الحق لأنه هو ذات جوهر الآب. ده كل ده يؤكد ألوهية السيد المسيح. وبما إن السيد المسيح هو الطريق اللي بيه نصل إلى عمق العلاقة القوية مع الله يبقى إذاً هو الحق. أي طريق آخر مش هيوصلنا، لا توجد فيه احتمالات أو تخمينات لأنه هو الحق. بيقولنا كده الكتاب لأن الناموس بموسى أعطي أما النعمة والحق فبيسوع المسيح صارا. الكتاب المقدس زي ما برضه اتكلم عن الطريق كتير اتكلم عن الحق كتير لكن يعني مش مجاله قوي دلوقتي. موقفي أنا طبعاً من الطريق ومن الحق، من الطريق أسلك في الطريق الحقيقي لكي أصل بإيماني بالمسيح إلى الحياة الأبدية. ومن الحق بيقولنا كده الكتاب المقدس إنه تعرفون الحق والحق يحرركم. إذاً بمعرفتي الحقيقية بالرب يسوع أستطيع أن أحرر ذاتي من كل ضعف ومن كل خطية. وإن حرركم الابن فبالحقيقة تصيرون أحراراً. إن قلنا إن لنا شركة معه وسلكنا في الظلمة نكذب ولسنا نعمل الحق. إذاً الحياة مع المسيح محتاجة لمعرفة حقيقية بالمسيح لسلوك حقيقي لكي نعيش في الحق الحقيقي. بالمحبة الصادقة نستطيع أن نعيش في الحق مع المسيح. يا أولادي لا نحب بالكلام ولا باللسان بل بالعمل والحق، وبهذا نعرف أننا من الحق. أنا هو الحياة. الحياة في العهد القديم كان مفهومها عبارة عن الصحة وطول العمر، هو ده الحياة. واحد ربنا مديله صحة مديله عمر طويل يبقى يعني حياته تمام قوي، وإذا فيها غنى يبقى ده يعني تمتع بكل الحياة. أما في العهد الجديد فسمت كلمة الحياة أصبحت هي العلاقة مع الله الموصلة إلى الحياة الأبدية هي دي الحياة. ومش ممكن نصل إليها إلا بالطريق وبالحق يبقى نصل إلى الحياة لأنه السيد المسيح هو مصدرها. التلاتة مرتبطين، أنا هو الطريق والحق والحياة. تتمسك بالسيد المسيح تمسكاً حقيقياً من كل قلبك تستطيع أن تصل إلى الحياة. هو مصدر الحياة، بيقولنا الكتاب فيه كانت الحياة والحياة كانت نور الناس، كل شيء به كان وبغيره لم يكن شيء مما كان. والسيد المسيح رسم لنا الوصول إلى الحياة بالأسرار، هي باب الدخول للحياة الأبدية، المعمودية توصلنا إلى الحياة الأبدية، سر الميرون يثبتنا في الحق، التناول هو ده الطريق اللي يوصلنا للحق وللأبدية، وحتى لو ضعفنا وصدرت أخطاء مننا نستطيع أن نرجع إلى طبيعتنا وقدستنا بالاعتراف. قدم لنا ذاته، أنا هو القيامة والحياة، أنا هو خبز الحياة، من يأكل من جسدي ويشرب دمي فله حياة أبدية وأنا أقيمه في اليوم الأخير. السيد المسيح هو مصدر الحياة، ولكي يؤكد إنه مصدر الحياة أعطانا كده بعض الأمثلة في إقامة الأموات ليس تكريماً للأشخاص وليس مجرد إنه يعطيهم حياة زمنية لأن كلهم ماتوا تاني، لكن علشان يؤكد إنه مصدر الحياة، وليؤكد مفهوم أعمق إن الموت ده رمز لموت الخطية وإن السيد المسيح ممكن يقيم أي إنسان يريد أن يقوم من موت الخطية. ابنة يايرس تمثل تملك جزئي كده من الخطية على الإنسان لسه ما انتقلتش من بيتها، خطية لسه في بدايتها كده. ابن أرملة نايين لا ده مشي شوية ووصل لغاية الشارع، خطية يعني استمرت مع الإنسان فترة. إقامة لعازر ده يعني اندفن وقعد أربعة أيام وأنتن وعظم وتحلل، ولكن مع هذا بيقولنا الرب أنا هو القيامة والحياة. لو إنت في ضعف عندك سواء في بدايته أو ليه سنين طويلة معاك أو يعني خلاص خلص عليك وأنهى أبديتك وحياتك في خطر، إذا رجعت إلى الله يستطيع أن يعطيك حياة أبدية لأنه هو الحياة. الحق الحق أقول لكم آية كده جميلة بتعجبني قوي هنقولها عشان ندي فرصة لسيدنا للأسئلة أكتر، الحق الحق أقول لكم إنه تأتي ساعة وهي الآن حين يسمع الأموات صوت ابن الله والسامعون يحيون. إذاً صوت السيد المسيح ووصاياه تستطيع أن تقيم الإنسان اللي يسمعها، اللي يسمعها لأن ناس كتير بتسمع صوت ربنا في الكتاب المقدس في الكنيسة في أي مكان لكن مين اللي بيسمع سمع حقيقي؟ ما فيش حد من المسيحيين ما قراش الكتاب المقدس نادراً، لكن مين اللي بيعمل بيه؟ اللي يسمع بيقولنا كده الكتاب حتى لو كان من الأموات يحيى. فكم وكم أولاد الله اللي عايشين معاه في عشرة مقدسة لما ينفذوا وصية ربنا ويسمعوا صوته تبقى حياتهم زي ما بيقولنا الكتاب المقدس نور العالم، أنتم نور العالم. الله يعطينا أن نتمتع بما أعطاه الله للبشرية، رسم لنا الطريق، أعطانا ذاته الحق والحياة حتى نتمتع بما قدمه ابن الله الوحيد من خلاص لكل إنسان في العالم، من مكان معد لكل واحد، أمضي وأعد لكم مكاناً، ومتى أعددت لكم مكاناً آتي وآخذكم إليّ، وأنتم تعرفون الطريق. يا ريت ما نسألش السؤال اللي سأله توما ونقوله هو فين الطريق أنا مش عارفه ده أنا مش عارف إنت رايح فين، لا أنا عارف يا رب، عارف الطريق وعارف إن أنا رايح فين بصلوات أبينا قداسة البابا يعطينا أن نعرف الطريق والحق والحياة ونسلك فيه ولإلهنا كل مجد وكرامة إلى الأبد آمين.